మీ ఇంటి LPG సిలిండర్ ధర ఇంత పెరిగిందా..? వెంటనే చెక్ చేయండి

ఒకప్పుడు కట్టెల పొయ్యిలతో వంట చేసుకునే రోజుల నుంచి ఇప్పుడు దాదాపు ప్రతి ఇంట్లో ఎల్పీజీ గ్యాస్ సిలిండర్ తప్పనిసరి అయిపోయింది. కుటుంబ అవసరాలు, వ్యాపార అవసరాలు, పరిశ్రమల అవసరాలను బట్టి వివిధ రకాల సిలిండర్లు మార్కెట్లో అందుబాటులో ఉన్నాయి. వాటి పరిమాణం, వినియోగ విధానం ఆధారంగా ధరలు కూడా మారుతూ ఉంటాయి.

సాధారణంగా ఇళ్లలో ఎక్కువగా ఉపయోగించే 14.2 కిలోల గృహ వినియోగ సిలిండర్ ధర ప్రస్తుతం సుమారు రూ.913గా ఉంది. అయితే హైదరాబాద్ వంటి కొన్ని నగరాల్లో ఇది రూ.965 వరకు చేరింది. చిన్న కుటుంబాలు లేదా తాత్కాలిక అవసరాల కోసం వాడే 5 కిలోల సిలిండర్ ధర రూ.339 వరకు ఉంది.

ఇటీవల మార్కెట్లోకి వచ్చిన ఎక్స్‌ట్రాలైట్ సిలిండర్లు కూడా వినియోగదారులను ఆకర్షిస్తున్నాయి. ఇవి తేలికగా ఉండటమే కాకుండా, లోపల ఎంత గ్యాస్ ఉందో బయట నుంచే కనిపించేలా రూపొందించారు. 10 కిలోల ఎక్స్‌ట్రాలైట్ సిలిండర్ ధర ప్రస్తుతం రూ.652.5 వద్ద ఉంది. పరిమాణాన్ని బట్టి వీటి ధరలు రూ.339 నుంచి రూ.826 వరకు ఉంటున్నాయి.

హోటళ్లు, రెస్టారెంట్లు, డెయిరీ యూనిట్లు వంటి వాణిజ్య అవసరాల కోసం ఉపయోగించే 19 కిలోల కమర్షియల్ సిలిండర్ ధర ప్రస్తుతం రూ.3,071 వరకు చేరింది. అలాగే హై ఎఫిషియన్సీ కమర్షియల్ సిలిండర్ల ధరలు రూ.3,094 నుంచి రూ.3,225 మధ్యలో కొనసాగుతున్నాయి.

పెద్ద హోటళ్లు, పరిశ్రమల కోసం భారీ సామర్థ్యం గల ఎల్పీజీ సిలిండర్లు కూడా అందుబాటులో ఉన్నాయి. 47.5 కిలోల సిలిండర్ ధర రూ.7,674 నుంచి రూ.7,730 వరకు ఉంది. ఇక భారీ ఫ్యాక్టరీలు, ఇండస్ట్రియల్ యూనిట్లు వినియోగించే 425 కిలోల బల్క్ సిలిండర్ ధర రూ.68 వేల నుంచి రూ.69 వేల మధ్యలో ఉంది.

ఇక చిన్న దుకాణాలు, కుటీర పరిశ్రమల కోసం ఉపయోగించే నాన్ డొమెస్టిక్ 5 కిలోల సిలిండర్ ధర రూ.810 నుంచి ప్రారంభమవుతోంది. మరికొన్ని ప్రత్యేక వాణిజ్య సిలిండర్ల ధరలు రూ.1,754 నుంచి రూ.1,770 వరకు ఉన్నాయి.

అయితే ఈ ధరలు రాష్ట్రం, నగరం, పన్నుల ఆధారంగా స్వల్పంగా మారే అవకాశం ఉంటుంది. కాబట్టి తాజా ధరల కోసం స్థానిక గ్యాస్ ఏజెన్సీలను సంప్రదించడం మంచిదని అధికారులు సూచిస్తున్నారు.